قيل لابي تمام أن لك قصائد قوية يكون فيها بعض الابيات الرديئة فلم لا تحذفها فأجاب بأن ابيات الشاعر كأولاده مهما كان ولده قبيحا لا تجود نفسه بالتخلي عنه ، وهذه الابيات وليدة لحظتها من دون تنقيح وتعديل ، والمعذرة على ما فيها من ارتجالية واضحة ..
وهي بعمي الغالي : فريح بن مشهد المطرفي الذي شهد له البعيد قبل القريب .. ولا عليكم زود ..
الله يا عمي يمسيك بالخير=ليلٍ وشفتك فيه والله خيره
وشلون اعبر عن غلاتك بتعبير=انا اشهد انك يالسنافي ذخيره
طير الهدد ، والصيد لا جيته مغير=عز الله ان الطير ما طار طيره
انت السند وقت الوزا والمعاسير=لا صرت جنبي والعسيره يسيره
وانت الذي لا جيت تقطن على البير=وانت الذي مدك عطايا كثيره
وانت الذي لكليب يا سالم الزير=يومٍ تملك صار لجله وزيره
بشسع نعل كليب خلّص على جبير=خلاه لجل كليب يلقى مصيره
انت الذي بالباس شيخ المساطير=وانت الذي بالحلم قصه وسيره
وانت الذي بالحرب نفاخ للكير=شباب نار الحرب نار السعيره
تنطح نهار الكون منهم طوابير=يطول ليل اللي يدينه قصيره
الين يقفي بالعنا والمخاسير=من عقب زومه جاه مر الكسيره
يقفون بالخيبات ولوا مدابير=ولت به النكبات حايس مريره
بارض الهدد يمناك يشبع بها الطير=عشيتهن من بعد هلك الظهيره
وانت الذي قدرك علا كل تقدير=بعدك فلا والله لحيه قديره
فتاح بابك للضيوف المسايير=كيف النشاما دوم واقف تديره
يلقون بالرسلان كيف المباهير=لا صار ريح العود شموا عبيره
يا جابرٍ بالعطف كسر المكاسير=عطفك عليهم يالسنافي جبيره
ياكاسرٍ بيديك عظم الجبابير=تكسر عظام اللي نفيسه كبيره
يا مخاشرٍ بالزاد سبع المساعير=خشيرك السرحان وانته خشيره
علمك وصل حد اليمن واصل الدير=طير السعد يا عز وجه العشيره
سلام يا شيخ السلف والمظاهير=يامالكٍ راس الكرم يا اميره
اشهر على راس العلم بالمشاهير=انت الذي وقفات جودك شهيره
ما همك بدنياك جمع الدنانير=ولا غرتك دنيا دنيه حقيره
يا بو اليتامى والضعوف المحاسير=اللي قضى بدنياه نفسٍ حسيره
وانت الذي بالعقل حكمه وتدبير=عمي لنا عين البصر والبصيره
لامن تزهل بالخطر والمحاذير=لا حلت اللزمات ما فيه غيره
ضوه غطا ضو النجوم المسافير=والطيب منه مستفيضٍ غديره
يا مصخرٍ ماله من الجود تصخير=يا حاميٍ منهو لجا يستجيره
الطيب عبدٍ لك مهو بقول تزوير=اكبر كبيره في عيونك صغيره
ما عمرك بطيبك حسبت المخاسير=الطيب طبعك بالعلن والسريره
اسمك تعلا فوق كل المشاهير=حتى القمر يغبطك حسدٍ وغِيره
والشمس مكسوفه على حزة عصير=نورك غطا بالنور شمسٍ منيره
بالخلق كنك للصلاوات تكبير=وانت الذي للخلق دارٍ وديره
يا جاير الجاير اذا جاك بتجير=من حط برقبته عظيم الجريره
يا مزبن الجاني بوقت المخاطير=اللي على نفسه جرايم خطيره
احلى وصوفك من درير المباكير=وباسك على العايل سيوفٍ شطيره
يا مدله المحتار صبرٍ وتبشير=يستانس المحتار من بعد حيره
يا ستر بالشدات ضعف الغنادير=لا طشت الغشوه بها تستجيره
سيلك هما نو السما والمحادير=يبرق خيالك بالسما من هديره
انت الذي للناس عين المقادير=كنك لنا عبدالعزيز الجزيره
تفداك والله راكبات المقاصير=وعد ما المقصر مشابه بعيره
وختامها لعمي اسوق المعاذير=لو اني اكتب بالقصايد جديره
سطرتها بالقاف للمجد تسطير=كنه حريرٍ ناسجه من حريره
اقول في عمي ومن دون تاخير=يا عزنا اللي مالنا عز غيره
اعذر قصوري كان بالقاف تقصير=والسيف ما ينفع بلمعة جفيره
عجزت بالكلمه اصورك تصوير=كل القوافي منك تبغى الستيره
ازكى صلاتي مع سلامي وتكبير=للهادي لربه جوارٍ وجيره
21/10/05, (01:56 AM)
كنك لنا عبدالعزيز الجزيره ..
العرض العادي
