السلام عليكم
اسعد الله جميع اوقاتكم بكل خير
اعزائي اضع هذه القصيدة واتمنى ان تنال قليلا ً من رضاكم
الالــفـــيـــة
الف ٍ" الى اصحاب السعادة هل الشان = السالفة ماهي قصيدة وقيفان
مخطور وضعي لا يجي عقبه جنان = دامه تأزم من زماله وتفكير
والبا " بدت فكرة قصيدة جديدة = بطياتها ذكر العلوم المجيدة
مافيه لا ناقص ولا فيه زيدة = العلم واضح مثل وضح المغاتير
والتا " تركت الناس واخفيت سدي = السالفة عندي حماس وتحدي
ماهيب ود وهات ثم هات ودي = ابغا صداها فيه نشوة وتأثير
والثا " ثلاث ايام قاعد على حال = اهاوم المرقاب خايف ورحال
ماهو ردا لكن كذا المدح برجال = يبغالها حكمة وفطنة وتفسير
والجيم " جمعت الدفاتر والاقلام = ماهي بلحية حرف وبيوت وايتام
الا قصيدة في رجاجيل ٍ كرام = روس العرب نسل النشاما المصاطير
والحا " حرام العين لتعب نظرها = ماهو خسارة يوم يبطي سهرها
لين القصيدة يكتملّي بحرها = ولا منام العين والله ما يصير
والخا " خيال الشعر هالحين مابيه = ما اشوف له داعي وحزه وتنويه
ابغا الوكاد اللي ينومس بطاريه = مافيه داعي داخل المدح تشفير
والدال " دنيت المعاني بتصويب = في ربعي اللي لا عوى الذيب للذيب
تاخذ مواجيب وتعطي مواجيب = من كيفها ماهي غصيبه وتخيير
والذا " ذرف نبع المعاني على الفور = من نبع راسي ما تحريت به شور
ثم جتني القيفان طابور ... طابور = الدلو فكري والشعر جمة البير
والرا " ربوعي عن سواهم بهم فرق = تعالمو بفعالهم غرب من شرق
اللي تناطح خصمها ما تجي درق = من صلب وايل ما تبي زود تفكير
والزا " زمو مع كل درب بمسيره = مابه خطيره دام ربعي خطيره
ولاهمهم حلف العشير بعشيره = اللي نوو يكمل ولا فيه تقصير
والسين " سنينا لعدواننا سيوف = من لمعها خطر ٍ تأثر على الشوف
نبي ليا دقو على حربنا دفوف = جينا جموع ٍ نظرب الطبل والزير
والشين " شبينا الفتايل بالاعلام = حكام من حكام من ساس حكام
من العراق لنجد الى نقرة الشام = وحنا رفيعين المناكب مشاهير
والصاد " صدينا هل الباس والجيش = بعض العرب يومن نفش صدرة بريش
حتى لعن جده على ساعة الطيش = وحنا لجيتهم نسوق التباشير
والضاد " ضد الفرس حنا وقفنا = "المنذرية" يوم جت ما اختلفنا
"ذي قار" شاهدنا تحقق هدفنا = يومن ابوها ما على ايديه تدبير
والطا " طربنا بمجلس الخير والجود = يومن بعض الناس يطرب على العود
وحنا كرمنا ما وصل حده حدود = نتعب على الجمعة ونتعب على الخير
والظا " ظلام الليل لو كان حالك = والظيف حده حلكته واحتدالك
اذبح له اطيب ما تشوف بحلالك = وصية ٍ من جدنا كليب والزير
والعين " عنها ما انتغير ولا انحيد = نمشي عليها ما انتحدر مسانيد
الظيف لا جانا مثل هلة العيد = نفرح بذكره ما نسوق المعاذير
والغين " غابت شمس وتشرق لنا شمس = وشيوخنا هالحين وشيوخنا أمس
طب العليل العايل الغادي العمس = مثل الكواكب بالسما شامخه تنير
والفا " فداهم كل طيب سواهم = ماهو تكبـّر بس ذا من غلاهم
والا الردي تكرم معالي لحاهم = ماجيب له طاري بجنب المغاوير
والقاف " قمة طيبنا بطيبهم هم = يومن جرح الوقت باين ومشتم
تلاحمو معنا على الطيب من ثم = صاروا دروع وحنا عنهم مسامير
والكاف " كنا ولين هالحين نبقى = وعيال وايل للزعامات أبقى
تبقى مراجلهم على العز تبقى = وحنا نطوع وقتنا دون تأخير
واللام " للناس الكريمه علي دين = دواسر وشمر وحرب وقحاطين
سبعان وبقوم وقبايل شريفين = وعتيبه الهيلا ولا نهظم مطير
والميم " ما اقدر احصي الخلق ببيات = وكل ٍ عطاه الله من رفعة الذات
والدين كمل في طبايع وعادات = وكل القبايل تستحق المباهير
والنون " ناقوس الخطر انتهى وراح = ما عاد لا يضرب ولا عاد هو صاح
وكل ٍ على عيشه سعيد ٍ ومرتاح = ولا عاد نتعب بالمسافة من السير
والها " هدت نجد ٍ على جية الشيخ = ثم ارجهنت في يدين المصاليخ
اخوان نورة بالكتب والتواريخ = لين اقلبوها من صحاري نوافير
والواو " ودي بآخر القاف عنوان = لخيالة الجدعا سلايل سليمان
وانا من اصغرهم هل الهيل والزان = وارسل سلامي للرجال المناعير
واليا " يا عالم في خفي الضماير = ياواحد تفني اقوام وعشاير
بأمرك اللهي مسرح الوقت ساير = ترحم عبادك دام حنا مسايير
وســـــلامـــتــكــــم
15/01/07, (03:46 PM)
الالفيه الوائليه
العرض العادي
